‘లూజర్’ సాంగ్.. ‘ఐయామ్ గేమ్’ కోసం గాయకుడిగా మారిన దుల్కర్ సల్మాన్

యూత్ ఐకాన్, విలక్షణ నటుడు దుల్కర్ సల్మాన్ నటిస్తున్న తాజా యాక్షన్ ఎంటర్‌టైనర్ ‘ఐయామ్ గేమ్’. నహాస్ హిదాయత్ దర్శకత్వంలో రూపొందుతున్న ఈ చిత్రంపై భారీ అంచనాలు నెలకొని ఉన్నాయి. ఈ సినిమా నుంచి అభిమానుల కోసం ‘లూజర్’ అనే గీతాన్ని మేకర్స్ గురువారం విడుదల చేశారు. మలయాళంలో ఈ పాటను స్వయంగా దుల్కర్ సల్మాన్ ఆలపించడం విశేషం.’లూజర్’ అనే పదాన్ని సాధారణంగా నెగటివ్‌గా చూస్తారు. కానీ ఈ పాటలో మాత్రం దాన్ని చాలా సరదాగా, పాజిటివ్‌గా సెలబ్రేట్ చేసుకునేలా చిత్రీకరించారు. సినిమాలోని పాత్రల స్వభావాలను, వారి అస్తవ్యస్తమైన ప్రపంచాన్ని ఈ పాట సరదాగా పరిచయం చేస్తుంది. జేక్స్ బిజోయ్ అందించిన సంగీతం, సుహైల్ కోయా సాహిత్యం పాటకు మరింత ఊపునిచ్చాయి. తెలుగులో ఈ పాటకు సనారే సాహిత్యం అందించగా, బెన్నీ దయాళ్ ఆలపించాడు. ఈ పాట గురించి దుల్కర్ మాట్లాడుతూ, “‘లూజర్స్‌’ను సెలబ్రేట్ చేసే పాట ఇది. చాలా సరదాగా అనిపించింది. దీన్ని పాడే అవకాశం కూడా నాకు లభించింది” అని అన్నారు. సినిమాలో తన పాత్ర గురించి చెబుతూ, “ఈ చిత్రంలో నేను చాలా అల్లరిచిల్లరగా ఉండే పాత్రలో కనిపిస్తాను. ఇది నిజ జీవితంలో నాకు పూర్తి భిన్నమైనది. సినిమా చివరికల్లా నా పాత్రలో మార్పు వచ్చి, మీ అందరినీ మళ్ళీ గెలుచుకుంటానని ఆశిస్తున్నాను” అని వివరించారు.మలయాళంతో పాటు తెలుగు, తమిళం, హిందీ, కన్నడ భాషల్లో ఈ పాటను విడుదల చేసినట్లు దుల్కర్ సోషల్ మీడియా ద్వారా తెలిపారు. వాస్తవానికి ఈ సినిమా ఆగస్టు 20న విడుదల కావాల్సి ఉండగా, సెప్టెంబర్ 3కి వాయిదా పడింది. మరింత విస్తృతంగా, ఎక్కువ థియేటర్లలో విడుదల చేయాలనే ఉద్దేశంతోనే ఈ నిర్ణయం తీసుకున్నట్లు దుల్కర్ గతంలో ఓ ప్రకటనలో వెల్లడించారు. “గేమ్ పెద్దది అవుతోంది, విడుదల కూడా విస్తృతంగా ఉంటుంది. ఈ సినిమాను సెప్టెంబర్ 3న ప్రపంచవ్యాప్తంగా విడుదల చేస్తున్నాం” అని ఆయన పేర్కొన్నారు.ఈ యాక్షన్ థ్రిల్లర్‌ను దుల్కర్ సల్మాన్ తన సొంత నిర్మాణ సంస్థ వేఫేరర్ ఫిల్మ్స్‌పై జోమ్ వర్గీస్‌తో కలిసి నిర్మించారు. దాదాపు 11 నెలల పాటు 156 రోజుల షూటింగ్ జరుపుకున్న ఈ చిత్రాన్ని దక్షిణ భారతదేశంలోని 100కు పైగా లొకేషన్లలో చిత్రీకరించారు. ఆంటోనీ వర్గీస్, మిస్కిన్, కయాదు లోహర్, కదిర్, సంయుక్త విశ్వనాథన్ కీలక పాత్రల్లో నటించగా, అన్బరివ్ మాస్టర్స్ యాక్షన్ కొరియోగ్రఫీ అందించారు.