వెనిజువేలా చమురుపై అమెరికా భారీ పట్టు.. 65 బిలియన్ బ్యారెళ్లపై మెజారిటీ నియంత్రణ

వాషింగ్టన్: అమెరికా–వెనిజువేలా మధ్య భారీ చమురు ఒప్పందం కుదిరింది. వెనిజువేలాలోని 65 బిలియన్ బ్యారెళ్లకు పైగా నిర్ధారిత చమురు నిల్వలపై అమెరికాకు మెజారిటీ నియంత్రణ లభించేలా ఒప్పందం జరిగినట్లు అమెరికా అధ్యక్షుడు డొనాల్డ్ ట్రంప్ ప్రకటించారు. దీనిని ఆయన ప్రపంచ చరిత్రలోనే అతిపెద్ద చమురు ఒప్పందంగా అభివర్ణించారు. ప్రైవేట్ రంగ భాగస్వామ్యంతో, అమెరికా పన్ను చెల్లింపుదారులపై అదనపు భారం లేకుండా ఈ ఒప్పందాన్ని కుదుర్చుకున్నట్లు ట్రంప్ తెలిపారు. అమెరికా విదేశాంగ మంత్రి మార్కో రూబియో, రక్షణ మంత్రి పీట్ హెగ్‌సెత్, వెనిజువేలా తాత్కాలిక అధ్యక్షురాలు డెల్సీ రోడ్రిగెజ్ కలిసి ఈ ఒప్పందాన్ని ఖరారు చేసినట్లు వెల్లడైంది. ఇందులో భాగంగా వెనిజువేలాలోని 17 వ్యూహాత్మక చమురు క్షేత్రాలను అభివృద్ధి చేయనున్నారు. ఈ ప్రాజెక్టులకు 100 బిలియన్ డాలర్లకు పైగా ప్రైవేట్ పెట్టుబడులు రావడంతో పాటు వెనిజువేలా ప్రభుత్వానికి 209 బిలియన్ డాలర్లకు పైగా పన్ను ఆదాయం సమకూరే అవకాశం ఉందని రోడ్రిగెజ్ తెలిపారు.ఈ ఒప్పందంతో వెనిజువేలా దెబ్బతిన్న చమురు పరిశ్రమను పునరుద్ధరించి ఉత్పత్తిని గణనీయంగా పెంచాలని లక్ష్యంగా పెట్టుకున్నారు. అమెరికాకు స్థిరమైన చమురు సరఫరా లభించడంతో పాటు ఇంధన భద్రత బలోపేతం అవుతుందని, భవిష్యత్తులో అమెరికాలో పెట్రోల్ ధరలు తగ్గేందుకు ఇది దోహదపడుతుందని ట్రంప్, రూబియో పేర్కొన్నారు. అయితే చమురు క్షేత్రాలు, మౌలిక వసతుల పునరుద్ధరణకు భారీ పెట్టుబడులు అవసరమైనందున ధరలపై ప్రభావం వెంటనే కనిపించకపోవచ్చని నిపుణులు చెబుతున్నారు. ప్రపంచంలోనే అతిపెద్ద నిర్ధారిత చమురు నిల్వలు వెనిజువేలాలో ఉన్నప్పటికీ, సంవత్సరాలుగా పెట్టుబడుల కొరత, మౌలిక వసతుల దెబ్బతినడం, నిర్వహణ సమస్యల కారణంగా ఉత్పత్తి సామర్థ్యం భారీగా తగ్గింది. తాజా ఒప్పందం ద్వారా అమెరికా పెట్టుబడులు, ప్రైవేట్ కంపెనీల భాగస్వామ్యంతో ఆ పరిశ్రమకు కొత్త ఊపునిచ్చే ప్రయత్నం జరుగుతోంది. అయితే ఒప్పందం అమలు విధానం, భాగస్వామ్య కంపెనీలు, చమురు క్షేత్రాలపై నియంత్రణకు సంబంధించిన పూర్తి వివరాలు ఇంకా వెల్లడికాలేదు.మొత్తంగా ఈ ఒప్పందం అమెరికాకు చమురు సరఫరా, ఇంధన భద్రతను బలోపేతం చేయడంతో పాటు వెనిజువేలాకు భారీ పెట్టుబడులు, ఆదాయం, ఆర్థిక పునరుద్ధరణకు అవకాశం కల్పించనుంది. ప్రపంచ చమురు మార్కెట్‌పై కూడా దీని ప్రభావం ఉండే అవకాశం ఉంది.