కదులుతున్న స్లీపర్‌ బస్సులో 16 ఏళ్ల బాలికపై అత్యాచారం
న్యూఢిల్లీ: ఉత్తరప్రదేశ్‌కు చెందిన 16 ఏళ్ల బాలికపై కదులుతున్న స్లీపర్‌ బస్సులో అత్యాచారం జరిగిన ఘటన ఢిల్లీలో వెలుగుచూసింది. ఈ ఘటనకు సంబంధించి బస్సు డ్రైవర్‌, కండక్టర్‌ను పోలీసులు అరెస్ట్ చేశారు. ఘటనపై కేసు నమోదు చేసి దర్యాప్తు చేపట్టారు.
పోలీసుల వివరాల ప్రకారం.. 11వ తరగతి చదువుతున్న బాలిక ఆగస్టు 4న నోయిడాలోని బంధువుల వద్దకు వెళ్లేందుకు బయలుదేరింది. భారీ వర్షం కారణంగా మార్గమధ్యలో నోయిడాలోని పరీచౌక్‌ వద్ద దిగిపోయింది. అక్కడ కొద్దిసేపు వేచి ఉన్న ఆమెకు ఓ స్లీపర్‌ బస్సు కనిపించింది. నోయిడా వైపు వెళ్తుందని భావించి ఆ బస్సులోకి ఎక్కింది.
బస్సులోకి ఎక్కిన తర్వాత కొద్దిసేపటికే డ్రైవర్‌, కండక్టర్‌ బాలికపై అత్యాచారానికి పాల్పడినట్లు పోలీసులు తెలిపారు. తనపై జరిగిన దాడిని ఎవరికైనా చెబితే తీవ్ర పరిణామాలు ఎదుర్కోవాల్సి వస్తుందని నిందితులు బెదిరించినట్లు బాలిక పోలీసులకు తెలిపింది.
అనంతరం బస్సు ఢిల్లీ వైపు వెళ్లి కశ్మీర్‌ గేట్‌ ప్రాంతానికి చేరుకున్నట్లు పోలీసులు గుర్తించారు. అక్కడ బాలికను బస్సు నుంచి దింపి వెళ్లిపోయినట్లు దర్యాప్తులో వెల్లడైంది. ఘటన అనంతరం బాలిక పోలీసులను ఆశ్రయించడంతో కేసు నమోదు చేసి నిందితుల కోసం గాలింపు చేపట్టారు.
సీసీటీవీ కెమెరాల ఫుటేజీ, ఇతర ఆధారాలను పరిశీలించిన పోలీసులు బస్సును గుర్తించారు. డ్రైవర్‌, కండక్టర్‌ను అదుపులోకి తీసుకుని విచారించారు. బస్సును కూడా స్వాధీనం చేసుకుని దర్యాప్తులో భాగంగా పరిశీలిస్తున్నట్లు పోలీసులు తెలిపారు.
బస్సులోని స్లీపర్‌ బెర్త్‌లకు తెరలు ఉండటంతో లోపల జరిగే విషయాలు బయటకు కనిపించని పరిస్థితి ఉన్నట్లు పోలీసులు గుర్తించారు. ఈ ఘటనకు సంబంధించి పూర్తి వివరాలను రాబట్టేందుకు దర్యాప్తు కొనసాగుతోంది.
