నేపాల్ వరద బాధితులకు అండగా ‘స్ట్రే కిడ్స్’ లీ నో

రూ.100 మిలియన్ల వోన్ విరాళం.. ఆపదలో ఉన్న కుటుంబాలకు ఆహారం, నీరు, తాత్కాలిక నివాసం

సియోల్: నేపాల్‌లో ఇటీవల సంభవించిన తీవ్ర వరదలు, భారీ విధ్వంసం నేపథ్యంలో ప్రముఖ కే-పాప్ గ్రూప్ ‘స్ట్రే కిడ్స్’ సభ్యుడు లీ నో మానవతా దృక్పథంతో ముందుకొచ్చారు. వరదల కారణంగా నిరాశ్రయులైన చిన్నారులు, కుటుంబాలకు సహాయం అందించేందుకు 100 మిలియన్ల కొరియన్ వోన్ (సుమారు 72 వేల అమెరికన్ డాలర్లు) విరాళంగా అందించారు.

లీ నో ఈ మొత్తాన్ని వరల్డ్ విజన్ సంస్థకు ఆగస్టు 28న అందించారు. వరదలతో తీవ్రంగా ప్రభావితమైన ప్రజలకు అత్యవసర సహాయం అందించడంతో పాటు, వారు తిరిగి సాధారణ జీవితం ప్రారంభించేందుకు ఈ నిధులను వినియోగించాలని కోరారు. వరల్డ్ విజన్ ఈ విరాళాన్ని ఆహారం, పోషకాహారం, తాత్కాలిక నివాసాలు, స్వచ్ఛమైన తాగునీరు, పారిశుధ్య సదుపాయాల కోసం ఉపయోగించనుంది.

చిన్నారుల కోసం ప్రత్యేక శ్రద్ధ

నేపాల్‌లోని పరిస్థితులపై స్పందించిన లీ నో.. విపత్కర పరిస్థితుల్లో ఉన్న బాధితులకు తన వంతు సాయం కొంతైనా బలాన్ని ఇవ్వాలని ఆకాంక్షించారు. వరద బాధితులు, సహాయక చర్యల్లో పాల్గొంటున్న సిబ్బంది వీలైనంత త్వరగా ప్రశాంతమైన సాధారణ జీవితానికి తిరిగి రావాలని కోరుకున్నట్లు ఆయన తెలిపారు.

సేవా కార్యక్రమాల్లో లీ నోకు ప్రత్యేక గుర్తింపు

లీ నోకు వరల్డ్ విజన్‌తో అనుబంధం కొత్తది కాదు. 2014 నుంచి విదేశాల్లోని చిన్నారులకు స్పాన్సర్‌గా సేవలందిస్తున్నారు. అంతేకాకుండా 2024లో ప్రపంచ ఆహార సంక్షోభ సహాయ కార్యక్రమానికి కూడా 100 మిలియన్ల వోన్ విరాళంగా ఇచ్చారు. గతంలో వైద్య సేవలు, జంతు సంక్షేమం వంటి కార్యక్రమాలకు కూడా ఆయన ఆర్థిక సహాయం అందించారు.

ఇక నేపాల్‌లో ఆగస్టు 26న సంభవించిన భారీ వరదలు ఇప్పటికే భారీ ప్రాణ, ఆస్తి నష్టాన్ని మిగిల్చాయి. హిమాలయ ప్రాంతంలో మంచు, రాళ్లు, మట్టి భారీగా ప్రవహించడంతో అనేక ప్రాంతాలు తీవ్రంగా దెబ్బతిన్నాయి. సహాయక చర్యలు కొనసాగుతున్న వేళ లీ నో అందించిన విరాళం బాధిత కుటుంబాలకు అత్యవసర అవసరాలు తీర్చడంలో ఉపయోగపడనుంది.