RTI ద్వారా వెలుగులోకి వచ్చిన సంచలన వివరాలు.. సికింద్రాబాద్ డివిజన్‌లోనే అత్యధికం
హైదరాబాద్, సెప్టెంబర్ 13 (సమాచార హక్కు): రైలు ప్రయాణికుల భద్రతపై మరోసారి ప్రశ్నలు తలెత్తుతున్నాయి. దక్షిణ మధ్య రైల్వే (SCR) పరిధిలో కవచ్ ఆటోమేటిక్ ట్రైన్ ప్రొటెక్షన్ వ్యవస్థ లేని మార్గాల్లో గత పదేళ్లలో 21 తీవ్రమైన రైలు ప్రమాదాలు జరిగినట్లు RTI ద్వారా వెల్లడైంది. ఈ వివరాలను దక్షిణ మధ్య రైల్వే సేఫ్టీ బ్రాంచ్ సెప్టెంబర్ 1, 2026న ఇచ్చిన సమాధానంలో వెల్లడించింది.
RTI సమాచార ప్రకారం 2016-17 నుంచి 2025-26 వరకు కవచ్ లేని సెక్షన్లలో మొత్తం 21 consequential train accidents నమోదయ్యాయి. వీటిలో 2019-20లో అత్యధికంగా 6 ప్రమాదాలు జరిగాయి.
ఏ ఏడాదిలో ఎన్ని ప్రమాదాలు?
- 2016-17: 1
- 2017-18: 3
- 2018-19: 2
- 2019-20: 6
- 2020-21: 1
- 2021-22: 0
- 2022-23: 3
- 2023-24: 2
- 2024-25: 2
- 2025-26: 1
మొత్తం 21 ప్రమాదాలు నమోదయ్యాయి. 2026-27 ఆర్థిక సంవత్సరంలో RTI సమాధానం ఇచ్చిన తేదీ వరకు కవచ్ లేని మార్గాల్లో consequential train accident ఏదీ నమోదు కాలేదని రైల్వే తెలిపింది.
సికింద్రాబాద్ డివిజన్‌లోనే ఎక్కువ
డివిజన్ల వారీగా చూస్తే సికింద్రాబాద్ డివిజన్‌లో 9 ప్రమాదాలు నమోదయ్యాయి. ఆ తర్వాత హైదరాబాద్ డివిజన్‌లో 5, విజయవాడలో 4, గుంతకల్‌లో 2, గుంటూరు డివిజన్‌లో 1 ప్రమాదం జరిగింది. నాందేడ్ డివిజన్‌లో కవచ్ లేని సెక్షన్లలో ఇలాంటి consequential accident ఏదీ నమోదు కాలేదు.
2019-20లో నమోదైన ఆరు ప్రమాదాల్లో సికింద్రాబాద్, గుంతకల్ డివిజన్లలో రెండేసి, విజయవాడ, హైదరాబాద్ డివిజన్లలో ఒక్కొక్కటి చొప్పున నమోదయ్యాయి.
కవచ్ ఎందుకు కీలకం?
కవచ్ అనేది రైళ్లను ప్రమాదాల నుంచి రక్షించేందుకు రూపొందించిన దేశీయ Automatic Train Protection (ATP) వ్యవస్థ. సిగ్నల్‌ను దాటి వెళ్లే పరిస్థితులు, వేగ నియంత్రణ వంటి సందర్భాల్లో ఇది కీలక భద్రతా వ్యవస్థగా పనిచేస్తుంది.
రైల్వే అధికారిక సమాచారం ప్రకారం దేశవ్యాప్తంగా కవచ్ అమలును విస్తరిస్తున్నారు. 2026 జూన్ నాటికి కవచ్ ట్రాక్‌సైడ్ పరికరాల ఏర్పాటు 7,726 రూట్ కిలోమీటర్ల మేర పూర్తయిందని కేంద్ర ప్రభుత్వం తెలిపింది.
RTIతో మళ్లీ తెరపైకి భద్రత అంశం
కవచ్ వ్యవస్థ విస్తరణ కొనసాగుతున్న సమయంలోనే SCRలో కవచ్ లేని సెక్షన్లకు సంబంధించిన పదేళ్ల ప్రమాదాల గణాంకాలు బయటకు రావడం ప్రాధాన్యత సంతరించుకుంది. ముఖ్యంగా సికింద్రాబాద్, హైదరాబాద్, విజయవాడ వంటి డివిజన్లలో నమోదైన ప్రమాదాల సంఖ్య ప్రయాణికుల భద్రతపై చర్చకు దారితీస్తోంది.
RTI ద్వారా వెలుగులోకి వచ్చిన ఈ గణాంకాలు కవచ్ అమలు వేగం, రైల్వే భద్రతా వ్యవస్థల విస్తరణపై మరోసారి దృష్టిని మళ్లించాయి.