ముంబై,సెప్టెంబర్ 11 (సమాచార హక్కు) : ప్రముఖ బాలీవుడ్ నటి బిపాసా బసుకు ఓ ప్రొటీన్ పౌడర్ విషయంలో చేదు అనుభవం ఎదురైంది. తాను ఉపయోగిస్తున్న ప్రొటీన్ పౌడర్ డబ్బాను తెరిచి చూడగా అందులో చిన్న చిన్న పురుగులు కనిపించాయని ఆమె తెలిపారు. ఈ విషయాన్ని సోషల్ మీడియా వేదికగా వెల్లడించిన బిపాసా.. ఆహార ఉత్పత్తుల నాణ్యతపై తీవ్ర ఆందోళన వ్యక్తం చేశారు.
ఈ ఘటనపై స్పందించిన ఆమె మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) కమిషనర్ తుకారాం ముండేను ట్యాగ్ చేశారు. వినియోగదారుల ఆరోగ్యంతో ముడిపడిన అంశాల్లో నాణ్యతా ప్రమాణాలను కఠినంగా అమలు చేయాలని కోరారు.
“మనం కొనుగోలు చేసే వస్తువులు, పదార్థాలు అన్నీ కల్తీగానే ఉంటున్నాయి. వీటిని అరికట్టేది మీరే. మీరే మా చివరి ఆశ” అంటూ బిపాసా తన పోస్ట్‌లో పేర్కొన్నారు.
బిపాసా చేసిన ఫిర్యాదుతో ప్రొటీన్ పౌడర్ నాణ్యతపై ఇప్పుడు చర్చ మొదలైంది. ఈ వ్యవహారంపై అధికారులు ఉత్పత్తిని పరిశీలించి, నిబంధనల ప్రకారం చర్యలు తీసుకునే అవకాశం ఉంది. వినియోగించే ఆహార పదార్థాల విషయంలో అప్రమత్తంగా ఉండాల్సిన అవసరాన్ని ఈ ఘటన మరోసారి గుర్తుచేస్తోంది.