మాజీ మంత్రి, వైఎస్సార్ కాంగ్రెస్ పార్టీ సీనియర్ నేత అంబటి రాంబాబును ఆ పార్టీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి ఫోన్‌లో పరామర్శించారు. గుండె సంబంధిత సమస్యతో హైదరాబాద్‌లోని అపోలో ఆసుప‌త్రిలో చేరిన అంబటి రాంబాబుకు వైద్యులు రెండు స్టెంట్లు అమర్చారు. ఈ నేపథ్యంలో జగన్ ఆయనకు ఫోన్ చేసి ఆరోగ్య పరిస్థితిని అడిగి తెలుసుకున్నారు.
ఈ సందర్భంగా తనకు అందించిన చికిత్స వివరాలను అంబటి రాంబాబు జగన్‌కు వివరించారు. అనూహ్యంగా ఆసుప‌త్రికి రావాల్సి వచ్చిందని, వైద్య పరీక్షల అనంతరం రెండు స్టెంట్లు వేసినట్లు తెలిపారు. అపోలో వైద్యులు తనకు మెరుగైన చికిత్స అందించారని, ప్రస్తుతం తన ఆరోగ్యం నిలకడగా ఉందని ఆయన చెప్పారు. త్వరలోనే తాను ఆసుప‌త్రి నుంచి డిశ్చార్జ్ అవుతానని జగన్‌కు వివరించారు.
ప్రస్తుతం అంబటి రాంబాబును వైద్యుల పర్యవేక్షణలో ఉంచారు. ఒకటి రెండు రోజుల్లోనే సత్తెనపల్లికి వస్తానని అంబటి పేర్కొనడంతో, ఆయన ఆరోగ్యం వేగంగా కుదుటపడుతున్నట్లు తెలుస్తోంది.